إنجي حسن
اسمها الحقيقي أميرة حسان و شهرتها أميرة الذهب، صاحبة أشهر سلسة معارض المجوهرات فى مصر والشرق الأوسط، لها بصمة مختلفة في مهنة تجارة الدهب.
أميرة الذهب قصة نجاح وشغف وطموح
شعارها المفضل الذهب زينة وخزينة، أميرة حسان، خريجة هندسة معمارية جامعة القاهرة لعام 2006 اشتغلت في مجال الهندسة حوالي 14 سنة.
وبدأت حكايتها في 2020 بعد ماشغلها وقف وكل البيبان اتقفلت في وشها ومبقتش لاقية اي دخل تصرف منه فقررت تسيب الهندسة وتشتغل في مهنة الصاغة، بسبب شغفها بالدهب وعالم المشغولات الذهبية، ورغم انها مكنش ليها اى علاقة بالمجال ولا بتفهم فيه الا انها فكرت في انه هيوفرلها دخل كبير هيساعدها على المعيشة.
ورغم معارضة اللى حواليها صممت تفتح المحل ده وتبدأ مشروعها كانت محوشة قرشين فبدأت كشريكة فى احد المحلات ومن خلال الشراكة دي بدأت تتعلم كل حاجه وكل التفاصيل اللى تخص تجارة الدهب وبقي عندها امكانية انها تعمل كل حاجه باحترافية كبيرة،وده كله كان في مده قصيرة اوي، ولكن فى كل شراكة دايما كان بيحصل خلافات، فقررت تلغي الشراكة وبسبب ذكائها قررت تسوق لنفسها ولشغلها عن طريق السوشيال ميديا وبقت اول ست في مصر تشتغل في مجال الدهب.
رحلة السوشيال ميديا
وبعد ما كانت الفيديوهات بتجييلها مشاهدات قليلة يدات تجيب مشاهدات بالملايين وبدأ شغلها يكبر بصورة ملحوظة، وفي خلال سنتين بس أميرة الذهب بقت أكبر تاجرة دهب في مصر وبعد ما كان عندها محل صغير واحد، أصبح عندها سلسلة محلات ناجحة واللى من مقومات نجاحها أنها جذبت ببساطتها و تلقائيتها وابتسامتها ولبسها للعبايات السمرا والمبهجه لقلوب الملايين من رواد السوشيال ميديا.
ده غير انها اخدت عهد على نفسها انها تخلي كل الناس تشتري دهب حتي لو مش معاهم فلوس وقدرت انها تصمم قطع جديدة بوزن جرام ونص جرام تناسب اى حد ويقدر يشتريها.
وكمان اتميزت بصناعة قطع بأشكال فريدة وغريبة مش هتلاقيها غير عندها وبدأت تصمم اشكال برة الصندوق كنوع من الدعاية ليها زى الكمامة الدهب والطرحة الدهب والايفون الدهب والتيتيانة الدهب للمولود ومصنوعات كتير مختلفة ومتميزة تناسب كل الاذواق.
ورغم حب أميرة الشديد واهتمامها بيه الا انها مش بتلبس الدهب غير للعرض وبس وشايفة ان الاستثمار في الدهب هو افضل مجال ليها ومقولتها اللى اشتهرت بيها هي الدهب زينة وخزينة.
تهديدات وتحذيرات
نجاحها الواسع اتسبب في مشاكل كبيرة ليها وغضب شديد من تجار الصاغة حواليها ورغم تعرضها اتهديدات وتحذيرات الا انها مااهتمتش وكملت طريقها وكان كل اهتمامها في شغلها وبس اللى بيساندها فيه جوزها واولادها ودول اكبر داعم ليها في حياتها، ومؤخراً اثار خبر تورطها في قضية مخدرات اهتمام واسع من المتابعين، ياتري ايه هي حقيقة تورطها في القضية وايه علاقتها برجل الاعمال شريكها المزعوم اللى تم القبض عليه في قضية مخدرات بقيمة 122 مليون جنيه؟
قطعة أسد من الذهب الفاخر عرضتها اميرة الدهب في احد الفيديوهات أثارت كتير من الجدل على منصات التواصل الاجتماعي وخصوصا لما ارتبط اسمها بضبط رجل أعمال في قضية تتعلق بإدارة مصنع للأسلحة والمخدرات ولفت الانتباه أن أميرة الذهب شريكة لرجل الاعمال ده في عدد من محلات بيع الذهب المعروفة
لكن أميرة الدهب نفت بسرعة أي تورط ليها في عصابة المخدرات أو أي ارتباط ليها برجل الأعمال المتهم واكدت أنه مش شريكها وأن نشاطها التجاري ملهوش اى علاقة بأي نشاط اجرامي وقالت الخبر مش حقيقي المحل بتاعي وأنا مليش شركاء فى المحل نهائي وهو خاص بيا.
ومن ناحية تانية نفت المصادر الأمنية كمان وجود أي علاقة بين أميرة الذهب وعصابة المخدرات اللى بيقودها رجل الاعمال اللى تم القبض عليه وبرأت ذمتها
استغلت دراستها في مجال الهندسة وقدرت تعمل طفرة في صناعة الدهب بقطع غريبة وفريدة وأفكار برة الصندوق لدرجة ان كل الناس بقي عندها شغف يشوفوا كل يوم ايه الجديد اللى عند أميرة الدهب حتي لو مش هيشتروه.
